ਅਮਰੀਕੀ ਕਿਰਤ ਵਿਭਾਗ ਦੀ H1B Willful Violator List ਵਿੱਚ ਇਸ ਵੇਲੇ 14 ਮਾਲਕ ਦਰਜ ਹਨ; ਵੱਖਰੀ ਡੀਬਾਰਮੈਂਟ ਸੂਚੀ ਵਿੱਚ ਚਾਰ ਕੰਪਨੀਆਂ ਹਨ ਜੋ ਪਾਬੰਦੀ ਦੌਰਾਨ ਨਵੀਆਂ ਪਟੀਸ਼ਨਾਂ ਨਹੀਂ ਭਰ ਸਕਦੀਆਂ।
ਅਮਰੀਕਾ ਦਾ ਕਿਰਤ ਵਿਭਾਗ (Department of Labor) H1B ਪ੍ਰੋਗਰਾਮ ਦੇ ਨਿਯਮ ਤੋੜਨ ਵਾਲੇ ਮਾਲਕਾਂ ਬਾਰੇ ਦੋ ਵੱਖ-ਵੱਖ ਸੂਚੀਆਂ ਰੱਖਦਾ ਹੈ। ਪਿਛਲੇ ਦਿਨੀਂ ਭਾਰਤੀ ਮੀਡੀਆ ਵਿੱਚ ਇਨ੍ਹਾਂ ਬਾਰੇ ਖ਼ਬਰਾਂ ਆਈਆਂ, ਪਰ ਦੋਵਾਂ ਸੂਚੀਆਂ ਅਤੇ ਉਨ੍ਹਾਂ ਦੀਆਂ ਤਰੀਕਾਂ ਰਲਗੱਡ ਹੋ ਗਈਆਂ। ਵਿਭਾਗ ਦੇ ਆਪਣੇ ਪੰਨਿਆਂ ਉੱਤੇ ਇਸ ਵੇਲੇ ਜੋ ਦਰਜ ਹੈ, ਉਹ ਇਸ ਤਰ੍ਹਾਂ ਹੈ।
H1B Willful Violator List ਤੇ ਡੀਬਾਰਮੈਂਟ ਸੂਚੀ — ਦੋ ਵੱਖਰੀਆਂ ਚੀਜ਼ਾਂ
ਪਹਿਲੀ ਸੂਚੀ ਉਨ੍ਹਾਂ ਮਾਲਕਾਂ ਦੀ ਹੈ ਜਿਨ੍ਹਾਂ ਬਾਰੇ ਵਿਭਾਗ ਨੇ ਤੈਅ ਕੀਤਾ ਕਿ ਉਨ੍ਹਾਂ ਨੇ ਨਿਯਮ ਜਾਣ-ਬੁੱਝ ਕੇ ਤੋੜੇ। ਵਿਭਾਗ ਮੁਤਾਬਕ ਇਹ ਸੂਚੀ 1 ਜੂਨ 2026 ਤੋਂ ਲਾਗੂ ਹੈ ਤੇ ਆਖ਼ਰੀ ਵਾਰ 29 ਮਈ 2026 ਨੂੰ ਅੱਪਡੇਟ ਹੋਈ ਸੀ। ਇਸ ਵੇਲੇ ਇਸ ਵਿੱਚ ਚਾਰ ਨਹੀਂ, ਸਗੋਂ 14 ਮਾਲਕ ਦਰਜ ਹਨ। ਇਸ ਪੰਨੇ ਉੱਤੇ ਫ਼ੈਸਲੇ ਦੀ ਤਰੀਕ ਦਿੱਤੀ ਜਾਂਦੀ ਹੈ, ਪਾਬੰਦੀ ਦੀ ਮਿਆਦ ਨਹੀਂ।
ਦੂਜੀ ਸੂਚੀ ਡੀਬਾਰਮੈਂਟ (debarred/disqualified) ਵਾਲੀ ਹੈ। ਅਸਲ ਰੋਕ ਇਸੇ ਸੂਚੀ ਤੋਂ ਲੱਗਦੀ ਹੈ — ਜਿਸ ਮਾਲਕ ਦਾ ਨਾਂ ਇੱਥੇ ਹੈ, ਉਹ ਦੱਸੀ ਮਿਆਦ ਦੌਰਾਨ ਨਵੀਆਂ H1B ਪਟੀਸ਼ਨਾਂ ਨਹੀਂ ਭਰ ਸਕਦਾ। ਇਹ ਸੂਚੀ 1 ਜੁਲਾਈ 2026 ਤੋਂ ਲਾਗੂ ਹੈ ਤੇ ਆਖ਼ਰੀ ਵਾਰ 29 ਜੂਨ 2026 ਨੂੰ ਅੱਪਡੇਟ ਹੋਈ। ਇਸ ਵੇਲੇ ਇਸ ਵਿੱਚ ਚਾਰ ਕੰਪਨੀਆਂ ਹਨ, ਤੇ ਚਾਰੇ ਹੀ ਉੱਪਰ ਵਾਲੀ 14 ਦੀ ਸੂਚੀ ਵਿੱਚ ਵੀ ਮੌਜੂਦ ਹਨ।
ਕਿਨ੍ਹਾਂ ਚਾਰ ਕੰਪਨੀਆਂ ਉੱਤੇ ਪਟੀਸ਼ਨ ਭਰਨ ਦੀ ਰੋਕ ਹੈ
- GowraTech, LLC — 12 ਮਈ 2025 ਤੋਂ 11 ਮਈ 2027
- Renotek Group LLC — 8 ਅਗਸਤ 2025 ਤੋਂ 7 ਅਗਸਤ 2027
- Seeloz, Inc. — 4 ਮਾਰਚ 2026 ਤੋਂ 3 ਮਾਰਚ 2028
- Sherwood at Mount Dora, Inc. (Sherwood Academy) — 26 ਮਈ 2026 ਤੋਂ 25 ਮਈ 2028
ਉੱਪਰ ਵਾਲੀ 14 ਮਾਲਕਾਂ ਦੀ ਸੂਚੀ ਵਿੱਚ ਇਨ੍ਹਾਂ ਚਾਰਾਂ ਤੋਂ ਇਲਾਵਾ Bonzer LLC, BER-IT Inc., Broadgate Inc., Virtulytix Inc, Macks USA Inc. (ਤੇ ਮੁਜੀਬ ਰਹਿਮਾਨ), Packet One LLC, Spate Business Solutions LLC, Jericho Woodworks Inc., SAAS IT Services LLC ਅਤੇ Valsatech Corp ਦੇ ਨਾਂ ਵੀ ਦਰਜ ਹਨ।
ਤਰੀਕਾਂ ਬਾਰੇ ਇੱਕ ਸਾਫ਼ ਗੱਲ
ਕਈ ਰਿਪੋਰਟਾਂ ਵਿੱਚ ਕਿਹਾ ਗਿਆ ਕਿ ਸੂਚੀ 29 ਜੁਲਾਈ 2026 ਨੂੰ ਅੱਪਡੇਟ ਹੋਈ। ਕਿਰਤ ਵਿਭਾਗ ਦੇ ਆਪਣੇ ਪੰਨੇ ਉੱਤੇ ਅੱਪਡੇਟ ਦੀ ਤਰੀਕ 29 ਜੂਨ 2026 ਲਿਖੀ ਹੈ, ਜੁਲਾਈ ਨਹੀਂ। ਜੁਲਾਈ ਦੇ ਆਖ਼ਰੀ ਹਫ਼ਤੇ ਵਿੱਚ ਇਹ ਖ਼ਬਰ ਭਾਰਤੀ ਮੀਡੀਆ ਵਿੱਚ ਚੱਲੀ ਜ਼ਰੂਰ ਸੀ, ਪਰ ਸੂਚੀ ਉਸ ਤੋਂ ਪਹਿਲਾਂ ਦੀ ਹੈ। ਕਿਸੇ ਮਾਲਕ ਬਾਰੇ ਫ਼ੈਸਲਾ ਲੈਣ ਵੇਲੇ ਤਰੀਕ ਦਾ ਫ਼ਰਕ ਮਾਅਨੇ ਰੱਖਦਾ ਹੈ, ਕਿਉਂਕਿ ਪਾਬੰਦੀ ਦੀ ਮਿਆਦ ਉਸੇ ਨਾਲ ਜੁੜੀ ਹੈ।
ਭਾਰਤੀ ਤੇ ਪੰਜਾਬੀ ਵਰਕਰਾਂ ਲਈ ਇਹ ਕਿਉਂ ਮਾਅਨੇ ਰੱਖਦਾ ਹੈ
H1B ਵੀਜ਼ੇ ਦਾ ਵੱਡਾ ਹਿੱਸਾ ਭਾਰਤੀ ਪੇਸ਼ੇਵਰਾਂ ਕੋਲ ਜਾਂਦਾ ਹੈ, ਤੇ ਪੰਜਾਬ ਤੋਂ ਵੀ ਹਰ ਸਾਲ ਕਾਫ਼ੀ ਨੌਜਵਾਨ ਇਸੇ ਰਾਹ ਅਮਰੀਕਾ ਪੁੱਜਦੇ ਹਨ। ਨੌਕਰੀ ਦੀ ਪੇਸ਼ਕਸ਼ ਮਿਲਣ ਵੇਲੇ ਆਮ ਤੌਰ ਉੱਤੇ ਤਨਖ਼ਾਹ ਤੇ ਅਹੁਦਾ ਹੀ ਵੇਖਿਆ ਜਾਂਦਾ ਹੈ, ਮਾਲਕ ਦਾ ਪਿਛਲਾ ਰਿਕਾਰਡ ਨਹੀਂ।
ਕਿਸੇ ਅਮਰੀਕੀ ਮਾਲਕ ਨਾਲ ਕਾਗ਼ਜ਼ ਲਾਉਣ ਤੋਂ ਪਹਿਲਾਂ ਦੋ ਗੱਲਾਂ ਵੇਖ ਲੈਣੀਆਂ ਚਾਹੀਦੀਆਂ ਹਨ — ਪਹਿਲੀ, ਕੀ ਕੰਪਨੀ ਦਾ ਨਾਂ ਇਨ੍ਹਾਂ ਵਿੱਚੋਂ ਕਿਸੇ ਸੂਚੀ ਵਿੱਚ ਤਾਂ ਨਹੀਂ; ਦੂਜੀ, ਕੀ ਪੇਸ਼ਕਸ਼ ਵਿੱਚ ਦਿੱਤੀ ਤਨਖ਼ਾਹ ਉਸ ਇਲਾਕੇ ਦੀ ਤੈਅ ਮਜ਼ਦੂਰੀ ਦੇ ਬਰਾਬਰ ਹੈ। ਦੋਵੇਂ ਸੂਚੀਆਂ ਜਨਤਕ ਹਨ ਤੇ ਵੇਖਣ ਲਈ ਕਿਸੇ ਵਕੀਲ ਜਾਂ ਏਜੰਟ ਦੀ ਲੋੜ ਨਹੀਂ।
ਇਸ ਤੋਂ ਪਹਿਲਾਂ ਵੀ H1B ਵੀਜ਼ਾ ਧੋਖਾਧੜੀ ਦੀ ਜਾਂਚ ਦੀਆਂ ਖ਼ਬਰਾਂ ਆਉਂਦੀਆਂ ਰਹੀਆਂ ਹਨ, ਅਤੇ ਭਾਰਤੀ H1B ਵਰਕਰਾਂ ਦੀ ਵਿੱਦਿਅਕ ਯੋਗਤਾ ਬਾਰੇ ਰਿਪੋਰਟ ਵੀ ਇਸੇ ਸਾਲ ਸਾਹਮਣੇ ਆਈ ਸੀ।
ਦੋਵੇਂ ਸੂਚੀਆਂ ਆਪ ਕਿੱਥੇ ਵੇਖਣੀਆਂ ਹਨ
ਦੋਵੇਂ ਸੂਚੀਆਂ ਕਿਰਤ ਵਿਭਾਗ ਆਪ ਰੱਖਦਾ ਹੈ ਤੇ ਸਮੇਂ-ਸਮੇਂ ਅੱਪਡੇਟ ਕਰਦਾ ਹੈ। ਨਿਯਮ ਜਾਣ-ਬੁੱਝ ਕੇ ਤੋੜਨ ਵਾਲਿਆਂ ਦੇ ਨਾਂ ਵਿਭਾਗ ਦੀ ਵਿਲਫੁਲ ਵਾਇਓਲੇਟਰ ਸੂਚੀ ਉੱਤੇ ਹਨ, ਅਤੇ ਪਟੀਸ਼ਨ ਭਰਨ ਉੱਤੇ ਰੋਕ ਵਾਲੇ ਨਾਂ ਡੀਬਾਰਮੈਂਟ ਵਾਲੇ ਪੰਨੇ ਉੱਤੇ। ਕਿਸੇ ਵੀ ਖ਼ਬਰ ਦੀ ਥਾਂ ਇਹੀ ਦੋ ਪੰਨੇ ਅੰਤਿਮ ਹਵਾਲਾ ਹਨ, ਕਿਉਂਕਿ ਨਾਂ ਜੁੜਦੇ ਤੇ ਹਟਦੇ ਰਹਿੰਦੇ ਹਨ।